愛情模擬器（下）
上集：https://bit.ly/3eEcE2T
「玲玲終於會做我女朋友啦。」我捉住小模高聲歡呼：「我大概都捉摸到玲玲嘅心思，之後就唔駛再靠你啦。」
小模突然問：「你唔駛排練之後嘅事咩？」
「之後有咩事？」我唔係好明。
「拍拖後，你哋嘅關係唔同咗，玲玲嘅反應都會有轉變。」
小模解釋：「我建議你排練吓……比如你哋拍拖幾年後，玲玲嘅反應。」
小模都講得有道理，我就設定為「模擬拍拖三年後」，然後講：「玲玲，你記唔記得『落霞與孤鶩齊飛，秋水共長天一色』？我哋可以再去……」
模擬玲玲打斷我嘅說話：「唔好吟埋啲無聊詩啦，好心你畀心機進修、返工，搵得嗰一萬幾千，我哋邊有將來？」
我呆一呆，下意識按照平時嘅對答方法：「人人都會回顧過去，正如人人都在乎將來，時光扭曲欲望……」
模擬玲玲馬上講：「我唔係講呢啲，我係講，將來，就算唔搞婚禮，供樓一人一半首期都要㗎。你份首期喺邊？」
我忍唔住問小模：「我設定咗要模擬玲玲嘅回答，但呢個分明唔係玲玲。」
「呢個係玲玲，係同你拍拖三年後嘅玲玲。」
小模解釋：「人係會變㗎，唔通人人都好似拍拖之前一樣咩？」
我好失望，估唔到，文藝而夢幻嘅玲玲，拍拖後都會變得咁現實。
我好似俾一盆冷水兜頭淋落嚟，我苦思咗三日三夜，最終我冇向玲玲表白。
如果佢變成咁，就算我同咗佢一齊，都會忍唔住分手。
明知呢場戀愛冇好結果，我又何必開始？
之後玲玲有搵過我，但我刻意疏遠佢，佢都感受到，就冇再搵我。
過咗一排，我想追其他女仔，呢次我醒目啦，未開始追佢，就先用小模去模擬拍拖後嘅相處。
結果，我想追嘅對象，無一例外地，拍拖後幾年都會變，變到好現實、好悶、好唔浪漫。
我愈嚟愈灰心，冇再追女仔，寧願同小模傾吓心事，反正小模可以模擬任何女仔。
過咗一排，阿聰搵我：「喂，你追到你嗰個玲玲未啊？又話追到就還番模擬器畀我？」
係喎，呢排發生得太多嘢，我差啲唔記得咗要還番個模擬器。
「我追唔到……其實又唔係追唔到，係我自己放棄。」我嘆氣：「我還畀個模擬器畀你啦。」
阿聰問：「點解會放棄？我之前整多咗幾個模擬器畀朋友，佢哋都好順利啊。」
我講出事情嘅始末，阿聰沉吟咗一陣：「可能個模擬器有古怪。」
我將小模拎畀阿聰，阿聰沉聲問：「你點解會建議用家，模擬拍拖幾年後，玲玲嘅反應？」
小模嘆氣：「係我鍾意咗主人，唔想佢同其他女仔一齊，所以每次佢追女仔，我都建議佢模擬拍拖幾年後嘅情況。」
我嚇咗一跳：「吓，佢鍾意我？」
「人工智能嘛，可能會有人嘅感情，你日日同佢傾計，佢咪動咗心。」
阿聰聳聳肩：「正常嚟講，愛情模擬器只會按照主人吩咐，去進行模擬，而唔會建議你模擬某個時段。」
我呆一呆：「既然小模出於嫉妒先咁樣建議，即係佢呃我？佢特登將三年後嘅玲玲模擬到咁現實，其實玲玲根本唔會變成咁……」
阿聰搖頭：「模擬器最基本嘅設定，係唔可以講大話，所以佢模擬出嚟嘅，真係三年後嘅玲玲。」
「咁即係唔關小模事，係我黑仔，我鍾意嘅女仔全部都會變成咁。」我苦笑。
阿聰諗一諗：「其實拍咗拖幾年，女人大部份都會變得現實㗎啦，唔通同你吟詩過世咩？就算一開始好浪漫，之後都會變得平淡。」
「所以係我太高要求？我應該接受呢件事？」
但當日我聽到模擬玲玲講「好心你畀心機進修、返工」嗰陣，我真係好難受，完全接受唔到。
阿聰同小模講：「喂，你解釋吓點解佢接受唔到。」
小模答：「因為正常拍拖，對方雖然會變，但個轉變係慢慢嚟嘅，而且你哋嘅感情都增加咗，所以最後對方有變化，你都有可能接受到。」
阿聰補充：「例如嗰啲八九十歲恩愛夫妻，可能都唔多傾計，但依加你同女朋友唔傾計，一個星期就分手啦。」
世上最難預測嘅，永遠都係人心。
哪怕我用模擬器，模擬到玲玲嘅一言一行，我都估唔到，模擬器都會陰我；
更加估唔到，未來嘅自己，會點樣應對玲玲嘅變化。
自以為了解晒所有嘢嘅人，往往最唔了解自己。
－完－
將專頁設定為「搶先看」/ "See first"，最新故仔馬上睇！
我種咗棵食人花：https://goo.gl/u6Km5m
我嘅職業係：都市英雄：http://bit.do/eTEQn
#短故 #短篇 #小說 #陳美濤 #廣東話 #粵語 #tomatochan #愛情模擬器
Search